ന്യൂഡൽഹി/ദോഹ: മേഖലയിൽ സുരക്ഷാ വെല്ലുവിളികൾ വർദ്ധിക്കുന്ന സാഹചര്യത്തിൽ ഖത്തറിന് ശക്തമായ ഐക്യദാർഢ്യം പ്രഖ്യാപിച്ച് ഇന്ത്യ. ഇന്ത്യൻ പ്രധാനമന്ത്രി നരേന്ദ്ര മോദി ഖത്തർ അമീർ ശൈഖ് തമീം ബിൻ ഹമദ് അൽതാനിയുമായി ടെലിഫോണിൽ സംസാരിക്കുകയും നിലവിലെ സംഭവവികാസങ്ങളിൽ ഇന്ത്യയുടെ നിലപാട് വ്യക്തമാക്കുകയും ചെയ്തു.ഖത്തറിന്റെ പരമാധികാരത്തെയും (Sovereignty) ഭൗമിക അഖണ്ഡതയെയും ചോദ്യം ചെയ്യുന്ന ഏത് നീക്കത്തെയും ഇന്ത്യ ശക്തമായി അപലപിച്ചു. ഈ പ്രതിസന്ധി ഘട്ടത്തിൽ ഇന്ത്യ ഖത്തറിനൊപ്പം ഉറച്ചുനിൽക്കുമെന്ന് പ്രധാനമന്ത്രി ഉറപ്പുനൽകി.മേഖലയിലെ സമാധാനവും സ്ഥിരതയും തകർക്കുന്ന നീക്കങ്ങൾ ഒഴിവാക്കണമെന്നും, ചർച്ചകളിലൂടെയും നയതന്ത്രത്തിലൂടെയും (Dialogue and Diplomacy) പ്രശ്നങ്ങൾ പരിഹരിക്കേണ്ടത് അനിവാര്യമാണെന്നും ഇരുനേതാക്കളും ചർച്ച ചെയ്തു."എന്റെ സഹോദരൻ ഹിസ് ഹൈനസ് ശൈഖ് തമീം ബിൻ ഹമദ് അൽതാനിയുമായി സംസാരിച്ചു. ഖത്തറിന് ഇന്ത്യയുടെ പൂർണ്ണ പിന്തുണ അറിയിക്കുന്നു. മേഖലയിൽ സമാധാനം പുനഃസ്ഥാപിക്കാൻ നയതന്ത്രം അനിവാര്യമാണ്. ഖത്തറിലെ ഇന്ത്യൻ സമൂഹത്തിന് നൽകുന്ന കരുതലിന് നന്ദി പറയുന്നുവെന്ന് തന്റെ ഔദ്യോഗിക 'X' (ട്വിറ്റർ) ഹാൻഡിലിലൂടെ പ്രധാനമന്ത്രി ചർച്ചയുടെ വിശദാംശങ്ങൾ പങ്കുവെച്ചു.
